يا مصراوية يا مصراوية , قربولى هنا جنب الضلية
انا عندى ليكم مسراوية* , الشاطر حسن و البت هنية

كان فيه مرة ولد شاطر , جاي من حتة شبه القناطر
شاف البت صبية و قاصر , والله فداكى العين و الخاطر

قالتله هنية غرضك ايه , قلى بسرعة يا حسن بيه
قالها طب مستعجلة ليه , هاجى لابوكى واقوله عليه

و صدقته العبيطة , والبيت اتملى زيطة
والحاجة... ستيتة .. هاتك زغاريط

ولا أمو فاروق .. والبت شروق
وعيال الحارة .. هاتك تنطيط

والبهجة اهى عمت و الناس اتلمت
و الوالدة اهى عرفت و يا فرحة ما تمت

الوالد مات ! و الكل سكات
و شوية صوات .. والتعلب فات

و اتجوزته هنية ف العشرين
صبية وحلوة تملى العين
يوم شهر سنة واتنين
و داخلة معاه ع التلاتين

مطلع عين امها
و مجنن اللى يتشددلها
كانوا بيحسدوها زمان ويقولوا يا بختها
دلوقتى حالها مايل والحزن ف قلبها

و ف يوم صحيت هنية
واكتشفت الحكاية المستخبية
الكلب لعبها صح
وحبكها مية مية

هو واتباعه قتلوا ابوها
و من فرحتها جردوها
واوام اوام جوزوها
لجل الورث و الاملاك ينهبوها

بس للظلم نهاية
وحقوها مسيرها جاية
و الرك ع النوايا
ها .. عجبتكوا الحكاية ؟
______________

* مسرحية و رواية معا

ملحوظة : اي تشابه بين ابطال القصة و شخصيات حقيقية الكاتب مسئول عنه تماما فالقصة ليست من نسج خياله و انما تمت للواقع بصلة

بقلمى اللى انكسر